Այսօր՝ 2022-01-27 | RSS | FACEBOOK

2021-07-08 10:08:06 2021-07-01 08:06:30 2017-10-20 12:23:59 2021-06-21 09:15:55 2019-01-16 10:09:19 2017-09-02 12:20:34 2021-07-09 08:20:34 2019-11-19 09:27:18 2021-07-09 09:25:21 2019-11-21 09:15:52 2021-07-09 08:55:31 2021-07-08 08:41:56

Թավշյա հեղափոխության «զոհերը». ովքե՞ր կդառնան քավության նոխազ

 

2018 թվականի ապրիլ-մայիս ամիսներին Հայաստանում տեղի ունեցած «թավշյա հեղափոխությունը» նոր հույսեր ու սպասումներ առաջ բերեց. մարդիկ սկսեցին հավատալ իրենց հավաքական ուժին և այն ապագային, որի մասին վաղուց ինչ-ինչ պատճառներով դադարել էին երազել:

Մայիսի 8-ին «թավշյա հեղափոխությունը» կարծես մասամբ հասավ իր տրամաբանական ավարտին, քանի որ, ինչպես Հայաստանի վարչապետի պաշտոնակատար Նիկոլ Փաշինյանը իր բազմաթիվ ելույթներում նշել է՝ ժողովրդի առաջադրած վարչապետի թեկնածուն հաղթեց և ժողովրդի իշխանությունը հաստատվեց:

Մայիսի 8-ից հետո դեպքերի կտրուկ զարգացումը կարծես հաստատելու եկած լիներ, որ հեղափոխությունն ու ժողովուրդը հաղթել է:

Այսպես, նախ հունիսի 16-ին բերման ենթարկվեց ԱԺ պատգամավոր, գեներալ Մանվել Գրիգորյանը: Նա բերման է ենթարկվել և ձերբակալվել` ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Ապա հունիսի 19-ին Ազգային ժողովը համաձայնություն տվեց Հանրապետական խմբակցության պատգամավոր Մանվել Գրիգորյանի նկատմամբ քրեական հետապնդում հարուցելու և նրան ազատությունից զրկելու՝ Գլխավոր դատախազի միջնորդությանը:

Նույն օրը Երևանի ընդհանուր իրավասության դատարանում որոշում կայացվեց «Դոն Պիպո» մականվամբ հայտնի Արթուր Ասատրյանի նկատմամբ խափանման միջոց կիրառել երկամյսա կալանքը: Արթուր Ասատրյանը բերման է ենթարկվել և ձերբակալվել «Մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առևանգումը» և «Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը» նախատեսված հանցագործություն կատարելու կասկածանքով:

Դեռ հասարակությունը չէր հասցրել հասկանալ՝ ինչ հնարավոր զարգացումներ կարող են լինել, երբ հունիսի 25-ին բերման ենթարկվեց Հայաստանի երրորդ նախագահ Սերժ Սարգսյանի եղբայրը՝ Ալեքսանդր Սարգսյանը՝ ապօրինի զենք կրելու կասկածանքով: Թերևս աննախադեպ երևույթ Հայաստանի անկախությունից մինչև 2018 թվականի գարուն ընկած ժամանակահատվածում: Մինչ այդ դժվար հնարավոր լինի մատնանշել մի դեպք, երբ իշխող էլիտայի ներկայացուցիչներից կամ նրանց հարազատներից որևէ մեկը բերման ենթարկվեր:

Նույն օրը ավելի վաղ բերման էր ենթարկվել նաև Սերժ Սարգսյանի թիկնազորի նախկին պետի տեղակալ, Պետական պահպանության ծառայության նախկին պետ, գեներալ-մայոր Վաչագան Ղազարյանը:

«Թավշյա հեղափոխությունը» ասպարեզ բերեց նաև մարդկանց, որոնց անունը Հայաստանի քաղաքական կյանքում գրեթե 10 տարի չէր շրջանառվում: Հուլիսի 26-ին «Մարտի 1»–ի գործով հարցաքննման կանչվեց Հայաստանի 2-րդ նախագահ Ռոբերտ Քոչարյանը: Իսկ հուլիսի 28-ին վերջինս կալանավորվեց: Օգոստոսի 13-ին վերաքննիչ դատարանն վերացրեց առաջին ատյանի դատարանի որոշումը և բավարարեց Քոչարյանի պաշտպանների ներկայացրած՝ խափանման միջոց կալանքը փոխելու միջնորդությունը:

Նույն գործով հարցաքննության էր կանչվել նաև ՀԱՊԿ գլխավոր քարտուղար Յուրի Խաչատուրովը՝ Մարտի 1-ի գործով հարցաքննվելու՝ որպես վկա: Վերջինս, պատճառաբանելով աշխատանքային ծանրաբեռնվածությունը, փոխանցել է, որ քննչական մարմին կներկայանա հուլիսի վերջին։

Նույն օրերին, ԱԱԾ-ն «անհանգստացրեց» նաև ԱԺ նախկին պատգամավոր Առաքել Մովսիսյանին՝ ապօրինի զենք կրելու կասկածանքով: Սակայն վերջինս առանց որևէ դժգոհության հանձնել էր իր զենքերը և նշել. «Շատ շնորհքով ներխուժել են, ոչ մի երեխա տանը չի վախեցել»:

Այսպես շարունակվեց նաև ամռան մյուս ամիսներին. ոստիկանությունը բերման ենթարկեց Սերժ Սարգսյանի եղբորորդուն՝ Նարեկ Սարգսյանին, «ասֆալտին փռվեցին» ԱԺ պատգամավոր Սամվել Ալեքսանյանի թիկնապահները:

Այժմ, երբ Հայաստանի քաղաքական կյանքում փոփոխություններ են սպասվում, դեկտեմբերի 9-ին նոր խորհրդարան է ձևավորվելու, դարձյալ նույն մարդկանց անուններն են շրջանառվում: Օրինակ, վերջին օրերին մամուլը գրում է, որ Ռոբերտ Քոչարյանը դեկտեմբերի առաջին հնգօրյակում դարձյալ ձերբակալվելու է: Մանվել Գրիգորյանի անունը ամռանը խիստ հաճախ շրջանառվելուց հետո դեկտեմբերի 9-ին ընդառաջ դարձյալ հնչում է: Մասնավորապես, նոյեմբերի 28-ին ՀՔԾ պետի պաշտոնակատար Սասուն Խաչատրյանը հայտնեց, որ դիմել է տարածքային կառավարման և զարգացման նախարարին, որ Գրիգորյանին պատկանող 40 անուն անշարժ գույք վերադարձվի համայնքին:

Նույն համատեքստում, վաչապետի պաշտոնակատար Նիկոլ Փաշինյանը Իջևանում անցկացվող քարոզարշավի ընթացքում նշեց, որ Սերժ Սարգսյանի եղբայրը՝ Ալեքսանդր Սարգսյանը, ցանկություն է հայտնել իր հաշվին առկա 30 միլիոն դոլարը հանձնել պետությանը: «Այս վերադարձված գումարներն առաջին հերթին պետք է ծախսվեն մեր զինված ուժերի վրա»,- ասաց վարչապետը:

Նիկոլ Փաշինյանը նշեց, որ հինգ միլիարդ դրամի գույք էլ Մանվել Գրիգորյանն է ցանկացել հանձնել պետությանը: Նա հայտնեց, որ կառավարությունն այս ցանկություններին դեռ չի արձագանքել, քանի որ պետք է նաև հանրության կարծիքը հաշվի առնել:

«Թավշյա հեղափոխությունը» բերեց այն պարզ գիտակցումը, որ ոչ ոք անպարտելի չէ և օրենքը բոլորի համար հավասար է: Սակայն հետաքրքրական է, որ այս 7 ամիսների ընթացքում, ինչպես դեպքերի զարգացումն է ցույց տալիս, օրենքը ոմանց համար «ավելի հավասար է», քան մյուսների համար. այդ պատճառով ցանկացած փոփոխություն ավելի հստակ ցույց տալու համար որպես քավության նոխազ են ընտրվում նույն մարդիկ:

Նարե ԳՆՈՒՆԻ