Այսօր՝ 2020-07-12 | RSS | FACEBOOK

2019-11-19 10:16:17 2020-01-15 11:02:47 2017-10-20 12:23:59 2018-03-16 10:48:17 2019-01-16 10:09:19 2017-09-02 12:20:34 2019-11-20 11:06:50 2019-11-19 09:27:18 2019-11-13 11:40:48 2019-11-21 09:15:52 2020-01-23 08:14:55 2020-01-16 10:27:17

Հայաստան-Իրան երկաթուղի, Հյուսիս-Հարավ ավտոմայրուղու շինարարության հարցում Իրանի հետ հնարավոր գործակցության հաստատում․ Հայաստան-Իրան հարցերն ու դրանց կարևորությունը՝ ըստ Վարդան Ոսկանյանի

 

Հայաստանի վարչապետ Նիկոլ Փաշինյանը փետրվարին պաշտոնական այցով կմեկնի Իրան։ Ըստ ԵՊՀ իրանագիտության ամբիոնի վարիչ, իրանագետ Վարդան Ոսկանյանի, այցը կարևոր է՝ հաշվի առնելով այն դադարը, որն օբյեկտիվ պատճառներով ի հայտ էր եկել Հայաստան-Իրան հարաբերություններում՝ պայմանավորված Հայաստանի ներքաղաքական զարգացումներով։

«Կարծում եմ՝ բարձր մակարդակի հանդիպման անհրաժեշտությունը վաղուց էր հասունացել Հայաստանի և Իրանի ղեկավարների միջև։ Նախ խնդիր կա Իրանի ներսում Հայաստանն ավելի հասկանալի դարձնելու՝ հաշվի առնելով վերջին փոփոխությունները, երկրորդը՝ բավական հարցեր կան, որոնք արժանի են քննարկման և արծարծման հենց բարձր մակարդակի հանդիպման ընթացքում»,- Globnews.am-ի հետ զրույցում ասաց իրանագետը:

Վարդան Ոսկանյանի դիտարկմամբ՝ հանդիպումն արդեն իսկ ցուցիչ է երկկողմ հարաբերությունների, և եթե հաշվի առնենք նաև վերջին զարգացումները՝ Միացյալ Նահանգների նոր դիրքորոշումները, Ադրբեջանի կողմից վարվող տեղեկատվական քարոզչական այն քաղաքականությունը, որով փորձ է արվում Հայաստան-Իրան հարաբերություններում ապատեղեկատվություն տարածել և այլ քարոզչական լծակների կիրառմամբ որոշակի լարվածություն առաջացնել, ապա նման այցը չափազանց կարևոր է։

Ոսկանյանը նկատեց, որ հայ-իրանական օրակարգում բովանդակային լուրջ փոփոխությունների խնդիր չունենք, պետք է ուղղակի իրացնել օրակարգը, որը բավական հարուստ է և մեծ ներուժ ունի։

«Որոշ նրբություններ կան՝ հաշվի առնելով նոր իրավիճակը, որը ստեղծվել է ամերիկյան պատժամիջոցների ֆոնին, պետք է կենտրոնանալ Հայաստանի և Իրանի համար կենսական նշանակություն ունեցող մի քանի մեծ ծրագրերի վրա՝ չմոռանալով մյուս բոլոր ոլորտները։ Ամենակարևոր ծրագիրը Հայաստանը Պարսից ծոց-Սև ծով տարանցիկ միջանցքի մաս դարձնելու ծրագիրն է, որն ունի բազմաթիվ բաղադրիչներ, բայց դրանցից ընթացիկը Հյուսիս-Հարավ ավտոմայրուղու շինարարությունն է և այս հարցում Իրանի հետ հնարավոր գործակցության հաստատումը»,- նշեց իրանագետը։

Նրա խոսքով, այս մեծ ծրագրի մյուս բաղադրիչը Հայաստան-Իրան երկաթուղին է, որը պահանջում է մեծ ֆինանսավորում, սակայն պետք է միշտ մնա թե՛ Հայաստանի, թե՛ Հայաստան-Իրան օրակարգում, քանի որ այն ունի քաղաքական և քարոզչական կարևոր դերակատարություն։

Վարդան Ոսկանյանը կարևորեց նաև էներգետիկ ոլորտի խոշոր ծրագրերը, որոնք առանչվում են նախ «Գազ` էլեկտրաէներգիայի դիմաց» գործարքի ծավալների մեծացմանը՝ բարձրավոլտ երրորդ էլեկտրագծի թողարկմամբ, որն այս պահին կառուցման մեջ է։ Ըստ իրանագետի, կարելի խոսել նաև իրանական գազի տարանցման խնդրի մասին, բնականաբար, հաշվի առնելով նաև ռուսական շահերը, այն կարող է իրականացվել եռակողմ, քառակողմ համագործակցության ձևաչափերով՝ նաև Թուրքմենստանի ներգրավվմամբ։

«Եթե իմ նշած ուղղություններով հայ-իրանական հարաբերությունները խորացվեն, և ստեղծվեն ոչ միայն խոսքային, այլ նաև գործողությունների ասպարեզ, ապա Հայաստան-Իրան հարաբերություններին սպասվում է լուսավոր ապագա։ Մենք պետք է բավականին ակտիվացնենք մեր հարաբերություններն Իրանի հետ՝ հաշվի առնելով այն հանգամանքը, որ Հայաստանի տնտեսական զարգացումը շատ թելերով կապված է Հայաստան-Իրան համագործակցության հետ»,- եզրափակեց իրանագետը։