Դու չի, դուք ա ձեզ համար. չեմ ուզում, որ որևէ մեկը խաբնվի մեր երիտասարդ տարիքին. Մխիթար Հայրապետյանը՝ Էդմոն Մարուքյանին

Ազգային ժողովում այսօր վիճաբանություն է տեղի ունեցել «Լուսավոր Հայաստան» և «Իմ քայլը» խմբակցությունների պատգամավորների մեջ։ «Իմ քայլը» խմբակցության պատգամավոր Մխիթար Հայրապետյանի ելույթի ընթացքում նրան տեղից ընդհատեցին ԼՀԿ պատգամավորներ Գևորգ Գորգիսյանը և Էդմոն Մարուքյանը:

«Պարոն Գորգիսյան, ես լուռ լսել եմ, հարգալից եմ վերաբերվել, ուրեմն տեղից ոչ մի խոսք: Պարոն Գորգիսյան, լռեք: Փոխեք ձեր հռետորաբանությունը և ոճը: Սա խնդրանք է: Բայց նաև չեմ ուզում ընկալվի որպես սպառնալիք, որ եթե դուք չփոխեք էս ամենը, մենք փոխենք մեր ոճը: Եվ ես չեմ ուզում, որ որևէ մեկը խաբնվի մեր երիտասարադ տարիքին: Դուխի հետ կապված, ինձ թվում է՝ այս հատվածը առնվազն պրակտիկորեն ապացուցել ա, որ ունի: Պարոն Մարուքյան, լռեք, մյուս անգամ չեմ թողնի ձայն հանեք այստեղից: Դու չի, դուք ա ձեզ համար»,- արձագանքեց Հայրապետյանը:

Ի պատասխան Էդմոն Մարուքյանը հարցրեց. «Դու ո՞վ ես»:

ԱԺ նախագահ Արարատ Միրզոյանն էլ իր հերթին նշեց. «Պարոն Մարուքյան, ելույթ է ունենում ԱԺ կրթության գիտության, մշակույթի, սփյուռքի, սպորտի հարցերի մշտական հանձնաժողովի նախագահ Մխիթար Հայրապետյանը: Շատ ցավում եմ ձեզ համար, որ մինչև հիմա չեք ծանոթացել»: