Կրթական բարձր ցենզ, սեռական դաստիարակություն և ծնողների խիստ ուշադրություն. ի՞նչ է պետք երեխային սեռական բռնությունից զերծ պահելու համար

Լինում են դեպքեր, երբ սեռական բռնության ենթարկվածները դիմում են մեզ, բայց հիմնականում խնդիրները լատենտ դրսևորում են ունենում: Այս մասին այսօր «Զարկերակ» մամուլի ակումբում հրավիրված ասուլիսի ընթացքում ասաց սեքսոպաթոլոգ Սևադա Հակոբյանը:

«Երբ մենք փորձում ենք ուսումնասիրել տվյալ սեքսոլոգիական խնդրի ծագումը, ապա ուսումնասիրում ենք հոգե-սեռական վիճակը, վաղ մանկությունում եղած խնդիրները: Իհարկե, լինում են դեպքեր, երբ այդ ընթացքում արձանագրվում են սեռական բռնության էպիզոդներ: Բայց, շատ հաճախ լինում է, որ մեզնից էլ են քողարկում այդ խնդիրը: Այսինքն՝ իրական պատճառները քողարկվում են նաև բժշկի հետ հանդիպման ժամանակ: Այս է խնդիրը»:

Սևադա Հակոբյանը նշում է, որ սեռական բռնություններից խուսափելու համար պետք է անհատի կրթական ցենզը բարձրացնել, խոսքը նաև սեռական կրթության մասին է: Սեքսոպաթոլոգը վստահեցնում է՝ այդ դեպքում մարդիկ չեն վախենա կամ ամաչի իրենց հետ պատահածի մասին բարձրաձայնելուց:

Սեռական բռնության հետևանքը կարող է լինել ինչպես սեքսոլոգիական, այիսնքն՝ հետագայում անձի սեռական խանգարումներ առաջացնող, այնպես էլ՝ անձի հոգեկերտվածքի փոփոխություններ: «Անժխտելի է, որ ցանկացած բռության, այդ թվում նաև սեռական բռնության ենթարկված անձ ունենում է լուրջ բացասական հետևանքներ»:

Երեխայի սեռական դաստիարակության հարցում, Սևադա Հակոբյանի խոսքով, բացառիկ մեծ դերակատարում ունի ծնողը: «Շատ կարևոր է, որ նախ ծնողը այդ տեսանկյունից կրթված լինի: Միայն այդ պարագայում նա կարող է հաշվի առնել երեխայի ընդհանուր պահանջմունքները»:

Ինչ վերաբերում է մանկության շրջանում սեռական բռնությունների կանխարգելմանը, ապա չափազանց կարևոր նշանակություն ունի երեխաների՝ մեծերի կողմից ուշադրության կենտրոնում գտնվելը: «Երբ որ նրանք ուշադրությունից դուրս են գտնվում, ապա ավելի մեծ հավանականություն կա, որ երեխան կենթարկվի սեռական ոտնձգությունների»: