Այսօր՝ 2021-11-30 | RSS | FACEBOOK

2021-07-08 10:08:06 2021-07-01 08:06:30 2017-10-20 12:23:59 2021-06-21 09:15:55 2019-01-16 10:09:19 2017-09-02 12:20:34 2021-07-09 08:20:34 2019-11-19 09:27:18 2021-07-09 09:25:21 2019-11-21 09:15:52 2021-07-09 08:55:31 2021-07-08 08:41:56

Հայրական տան փլուզվող տանիքից դուրս Տերյանն էր թևածում

 

«Վահանը լիրիկ տրամադրության, մեղմ բնավորության բանաստեղծ է: Նա չի օգտվում ժողովրդական լեզվի անհուն գանձերից: Մինն ասի դու Ախալքալակ ես ապրել, Լուսաղբյուրից ես ջուր խմել, քո երկրից խոսի, քո ժողովրդի լեզվով բան ասա, նրա շունչը տուր, նրա ոճը բեր… Ի՞նչ ես գնացել Փարիզի մայթերն ու կաֆեները երգում, հետն էլ տերողորմյա քաշում»,- իր զրույցներից մեկում Հովհաննես Թումանյանն այսպես է նկարագրել Վահան Տերյան բանաստեղծին: Թեև, ըստ Թումանյանի, Տերյանը Ջավախքի հողն ու ջուրը չէր գովերում, նրա լեզվով չէր խոսում, միևնույն է, ջավախեցին ամենայն սիրով և խանդաղատանքով է խոսում Տերյանի մասին՝ հպարտությամբ նշելով, որ հենց Գանձան է տերյաններ ծնել:

Մնայուն արժեք ստեղծած և չհնացող Տերյանը

Ամեն տարի հուլիսի նախավերջին կիրակի օրը Գանձայում անցկացվում են «Տերյանական օրեր»՝ նվիրված Տերյանի պոեզիային, նրա գործունեությանն ու կյանքին: «Պարտադիր պայման է, որ առավոտյան Տերյանի պապի և հոր կառուցած եկեղեցում մատուցվում է Սուրբ պատարագ, այնուհետև տերյանասեր հասարակությունը այցելում է Տերյանի տուն-թանգարան, կոնկրետ այն տունը, որտեղ ծնվել և մեծացել է բանաստեղծը: Դրանից հետո դաշտահանդես է լինում՝ երգ, պար, բանաստեղծություն. ամենուր թևածում է տերյանական շունչն ու ոգին»,- նշում է Վահան Տերյանի տուն-թանգարանի գիտաշխատող Լիզա Աբգարյանը:

Լիզա Աբգարյանի խոսքով, «Տերյանական օրերին» մասնակցելու համար Ջավախք այցելողների թիվը տարեցտարի ավելանում է: «Երբ ասում են, որ ժամանակի ընթացքում որևէ բան մոռացվում է, անցնող արժեքների մասին են խոսում, իսկ կայուն արժեքները երբեք չեն մոռացվում, այլ՝ ընդհակառակը հետաքրքրությունը ավելի է մեծանում Տերյանի նկատմամբ»:

«Տերյանական օրեր». Հիմնական նպատակը՝ համընդհանուր մարտահրավերներին պատասխանելու միասնական կամք

Մշակութային կապերն այն կամրջող օղակն են, որոնց հիման վրա հասարակական, քաղաքական հարաբերությունները զարգանում են: «Այսօր տարածաշրջանում օդ ու ջրի պես անհրաժեշտ են հայ-վրացական ջերմ բարեկամական հարաբերություններն ու համընդհանուր մարտահրավերներին պատասխանելու միասնական կամքը»,-նշում է ԱԺ 6-րդ գումարման պատգամավոր Շիրակ Թորոսյանը:

Թորոսյանի խոսքով, հոգևոր սնունդն այն կարևոր բաղադրիչն է, որն անհրաժեշտ է հասարակությանը՝ առօրյա հոգսերից և խնդիրներից կտրվելու համար: «Այս դեպքում խոսքը մեծ պոետի մասին է, ում ամեն բառը հոգեցունց հնարավորություն ունի, և մարդկանց տանում է դեպի սերը, դեպի ջերմությունը»:

Հայրական տան փլուզվող տանիքն ու թևածող Տերյանը

Վահան Տերյանի տուն-թանգարանը խնդիրներ ևս ունի: Լիզա Աբգարյանը մատնանշում է՝ ցուցասրահը շատ փոքր է և չի ներկայացնում Տերյանին այնպիսին, ինչպիսին նա եղել է իրականում: Բացի այդ տունը շատ հին է, 1957 թվականից այս կողմ ոչ մի փոփոխություն չի արվել: «Մենք գիտենք, որ Տերյանը հայ գրականություն մտցրեց մաքուր լիրիզմը, բացի այդ նա հասարակական գործիչ էր, իսկ ցուցասրահում հնարավորություն չկա բանաստեղծին տարբեր ասպեկտներով ներկայացնելու: Մեր թանգարանը շատ խղճուկ է ցուցանմուշների առումով և ոչ մի փոփոխություն չի արվել: Մենք շատ ուրախ կլինեինք, որ լինեին հովանավորներ, ովքեր կաջակցեին Տերյանին հավուր պատշաճի ներկայացնել»:

Տերյանի հայրական տունը 137 տարվա շինություն է, և մի փոքր վերանորոգում իրականացվել է բանաստեղծի 100-ամյակին: Դրանից հետո ոչ մի գործ չի արվել, շենքը վթարային վիճակում է, այս տարի որոշ հատվածներ փլվել են:

Նշենք, որ միջոցառումն անց է կացվել ՀՀ գիտության, կրթության, մշակույթի և սպորտի նախարարության և «Ջավախքին աջակցություն» հիմնադրամի համատեղ ջանքերով:

Նարե ԳՆՈՒՆԻ